و من كثر المحاولات حسّيت إن الموضوع صار معقّد وجلست بينك وبين نفسك تفكر انك توقف او تسكر المشروع لإنك جربت
خططت ونشرت اشتريت كورسات ودايم ترجع تسأل نفسك طيب ليش مافي نتيجة؟
كأن في شي ناقص شي مو واضح وكأن في نقطة مفقودة
والأهم أن هذي الأفكار بتظهر لك في الليل لما تجي تحط رأسك عالمخدة مثل ماقال احدهم ( ثم جاء الليل، ساحة الاختبار الحقيقية لكل الهزائم النفسية)
تحس بثقل وتتقلب يمين ويسار وكأن بيصير في احتراق ببطء وتشعر انك استهلكت مخزونك من الطاقة العصبية وبعدها يعينك الله وتنام
يجي اليوم الثاني وتتكرر جميع المحاولات والأفكار والسلوكيات إلى الليل وترجع القصة اللي كل يوم تصير في الليل
الأكيد ممكن تتسأل وتقول الغلط فيني في مشروعي أصلاً خلاص الكل فتح نفسي الكل بيقدم خدمات مثلي هم اشطر هم اجرأ هم أقوى
وهذي افكار تتردد لإنك طوال الوقت انت بنيت صورة عن نفسك بإنك أقل
يمكن اللحين تتسأل طيب ايش الحل؟
وانا آسفة اني بقولك مافي حبة سحرية لكل هذا
ولكن في علاج مجاني لو أدركو الناس قوته الحقيقية ممكن تسكر نصف العيادات النفسية أنا هنا ما بقلل من شأن العيادات النفسية ولكن اعترف بقوة الاستشفاء الذاتي
العلاج هو (الكتابة التعبيرية)
حتمسك ورقة وقلم في الليل في الوقت اللي تشعر وتفكر فيه بكل الأفكار اللي تفكر فيها والمشاعر اللي تحس فيها وقت ما تحط راسك عالمخدة
وتبدأ في الكتابة عن كل شي تشعر وتفكر فيه
في علم النفس الكتابة التعبيرية تسمى بـ الإفراغ المعرفي
وانت تكتب كل شيء يبدأ يقل هذا التوتر الداخلي اللي عايشه تقل نسبة هرمون الكورتيزول في الدم ويتحسن مزاجك
يمكن تقول طيب وش الفايدة كتبت وفرغت بس النتائج مثل ما هي!!
مع التعود على الكتابة انت تدرب نفسك انك تكون في توتر اقل بالتالي الافكار، و الاستجابة اللي عندك بتبدأ تتغير ومن هنا بتبدأ تدرك امور ما كنت مدركها في مشروعك بسبب حالة التوتر والقلق الدائم
استخدم الكتابة التعبيرية كروتين يومي أداة مساعدة ما تستغني عنها تنظم كل الفوضى الداخلية، وهنا أنا اكتب تذكرت ان قد ايش الكتابة هذي ساعدتني في كل مراحل حياتي وحتى هذى اللحظة وانا اكتب هذا المقال كتبته لاني كنت في مكالمة مع شخص يشعر بإحباط شديد وانا كشخص مختص في الظهور الرقمي بِمعنى ما أقدر انصحه انه ينشر اكثر او يستخدم ترندات او يحسن محتواه هو مو في هذي الحالة ذهنيا وداخليا ومشاعريا مو محتاج هذي النصائح
محتاج مساحة يعطيها لنفسه ويسمع داخله ويفرغ
وخلونا نتذكر دائماً ان الله سبحانه وتعالى أقسم بالقلم (ن والقلم وما يسطرون)
وأيضآ نتذكر أن السكينة تنزل على القلوب المطمئنة فأنت تكتب عشان تفرّغ هذا القلب من الأعباء والأحمال الثقيلة عشان السكينة تلقى لها مكان تنزل فيه..
اتمنى اني قدرت اساعدك بشي بسيط من تجربتي كصاحبة مشروع في رحلة الحياة المهنية
وأحب ايضاً ادعوك لتحدي خاص بالبيع ولكن البيع بِمعنى
بيكون ٢١ يوم على قناة تلغرام نبدأ يوم ١ مايو بإذن الله
لو مهتم تبدأ وتخوض هذا التحدي ارسل لي رد على النشرة او على الخاص فى حساب انستغرام …
